Shtetet e Bashkuara kanë vendosur ndalim vizash për pesë shtetas evropianë, përfshirë një ish-komisioner të Bashkimit Europian, duke i akuzuar se kanë ushtruar presion mbi platformat teknologjike për të censuruar dhe shtypur pikëpamje amerikane në rrjetet sociale.

Sekretari amerikan i Shtetit, Marco Rubio, deklaroi se personat e sanksionuar janë aktivistë radikalë që, sipas tij, kanë promovuar masa censuruese nga shtete të huaja ndaj folësve dhe kompanive amerikane.

Figura më e njohur e përfshirë është Thierry Breton, ish-komisioner i BE-së për Tregun e Brendshëm, i cilësuar nga autoritetet amerikane si një nga arkitektët kryesorë të Aktit për Shërbimet Digjitale. Zyrtarë amerikanë e akuzojnë Breton se ka përdorur këtë ligj për të ushtruar presion ndaj platformave, përfshirë rrjetin social X, në pronësi të Elon Musk.

Breton reagoi duke e quajtur vendimin një “gjueti shtrigash” dhe duke e krahasuar me periudhën e makartizmit në SHBA, duke shtuar se censura nuk është aty ku mendon Uashingtoni.

Personat e tjerë të prekur nga ndalimi i vizave janë drejtues të organizatave europiane që merren me luftën kundër gjuhës së urrejtjes dhe dezinformimit. Ata e cilësuan masën si një përpjekje për të penguar zbatimin e ligjeve europiane ndaj kompanive amerikane që operojnë në Evropë.